الجزء ( 4 ) : للحب عنوان
ملخص الجزء السابق: رجوع خليفه بو سعيد من السفر.. وقرار عادل بالإرتباط بحصه.. كلام مريم الي زرع الحقد في قلب أحمد.. و رغبته في كشف الحقيقه..تابعونا
في السياره .. سلطان ووداد رواحهم..
وداد: ادريبكم متعمدين.. ايه انت.. ليش توقف؟؟
سلطان: اولا اسمي سلطان.. ثانيا.. تعالي قعدي جدام... شارده وقاعده لي ورى جني باكلج
وداد: لا والله.. مب يايه..
سلطان: وداد.. شو فيج علي انتي.. عسى ما اقول لج شي تتعمدين اتغثيني.. لو مره اعتبريني ولد عمج وعامليني كولد عم.. مابا زود..
افتشلت وداد من رمسة سلطان.. وحز في خاطرها .. لأنه مب من خاطرها انها اتعامل سلطان بهالطريقه وتجرحه.. بس اتحس عمرها مجبوره.. : انزين.. قعدت احين جدام.. شو الي تغير.
سلطان: بالنسبه لي وايد اشيا.. لأني اشتقت لج.. وداد.. والله وحشتيني.. ما تدرين شو صابني.. احس راسي داير ماعرف شو اسوي من دونج.. دخيلج حسي بقلبي..
وداد: هذا كلام مأخوذ خيره.. شو عندك غير هالكلام..
سلطان: ما عندي شي.. لأني اعرف ها ردج لي.. مادري شو الي كرهج فيه.. والي اذكره اني ما مر يوم وسويت شي حاولت اضايقج فيه..
وداد: انت وين ساير.. ها مب درب بيتكم اظني..
سلطان: بوديج مكان لنا فيه ذكريات حلوه..
وداد: ذكريات؟؟
سلطان: هيه يا وداد.. ذكريات.. ولا حتى تبين تحرميني من هالذكريات..
وداد تمت ساكته وتحبس الدمعه في عيونها وهي اتشوف الحزن في عيون سلطان.. ما اقدر.. ارجوك.. سلطان.. كله ولا اني اشوفك متضايق.. ياربي... ساعدني..
قرر سلطان انه يودي وداد صوب بحر جميرا وين ما كانوا دوم يروحون أيام الخطبه.. وحتى أيام صغرهم.. وكان مخصص موقع معين فوق صخره موجوده جريبه الشاطئ دوم كان يقعد وياها على ذيج الصخره ويرسم على الرمل اسمه واسمها..
سلطان: وداد.. وصلنا..
وداد كانت امنزله راسها.. وساكته..
سلطان: وداد.. نزلي حبيبتي..
وداد: رجاء.. الزم حدودك
سلطان: اسف.. ما دريت ان كلمه حبيبتي بتجرحج.. ما كان قصدي سامحيني
وداد: وين انزل..
سلطان: خل انسير نقعد على ذيج الصخره ويأشر صوب الموقع ومن غير لا ينتبه لنفسه إنه مجرب صوبها وايده جريبه من ويهها.. كانت وداد تشم ريحه عطره ومستغربه .. نفس العطر الي اهدته له أول مره.. انحرجت زود.. ونزلت راسها.. يوم انتبه لنفسه سلطان هو الثاني بعد خجل ورد ايده ونزل من الموتر يترياها.. .. يلا اترياج..
وداد: انت توك تستخدم العطر الي يبته لك..
سلطان: الي يبتيه خلص من ثاني يوم.. كنت كل اشوي اتعطر فيه عشان احس بوجودج.. والحين كل ما يخلص مني العطر اخذ غيره..
وداد كملت طريقها ومشت صوب الصخره وقعدت عليها وتمت تتطالع البحر.. وصوت الرياح والأمواج الي ترطم بالشاطئ..
سلطان: وداد.. شو تذكرين في هاللحظه..
وداد: ما اذكر شي..
سلطان راح صوبها .. وقعد على الأرض مجابلها.. : دخيلج.. وداد.. خبريني شي واحد ودي اعرفه..
وداد: شو؟
سلطان: شو الي غيرج علي؟؟؟.. شفتي علي شي؟؟ حد طرا لج شي ضايج عني؟؟
وداد اتنهدت ولفت عنه وتمت ساكته..
سلطان: ودااااااد.. لا تسكتين..
ودامت لحظه الصمت من بينهم.. وبدا سلطان يدندن هالكلمات..
انت مو قد الكلام.. كل يوم ولك كلام..
انت تلعب بالقلوب.. انت جاهل بالغرام..
هو المفروض اني اعكس الكلمات.. بس الموقف اجبرني اني اجلب الإغنيه السموحه جان خربت عليكم الإغنيه
ردت عليه وداد بهالكلمات:..
تظلمني يالحنون.. وانت قلبي والعيون..
اسمع عذر ابتعادي.. بعدها قولي اخون..
سلطان: يوم لج عذرج.. قوليه.. ريحيني.. دخييييلج.. وداد.. انا ما يبتج اليوم هني الا وانا خلاص تعبت وتعب قلبي معاي.. ارحمي شبابي..
وداد: بإبتعادي والي صار.. صدقني بإختصار هي ظروف وعاكستني.. مالي فيها أي قرار
ابتعد عني بعيد.. ما أبي حبك يزيد.. الهوى شوق وعذاب.. انت مو داري أكيد
سلطان: إنت شخص بلا ضمير.. لا تحب ولا تغير.. انا مثلك ما لقيت .. لا كبير ولا صغير
ما أصدق مستحيل.. هذا قلبك أو بديل.. كيف غروه العواذل.. واتهمني بلا دليل
وداد ما قدرت تتحمل الوضع تمت اتصيح.. : انت ما بتحس.. ولا بتعرف.. العذاب الي انا فيه اضعاف العذاب الي انت فيه.. افهمني سلطان دخيلك ارحم حالي.. بس يكفي.. انسااااااني..
سلطان وهو يمسك وداد من اجتافها ويهزها: انتي الي اباج تفهميني.. انتي الي اباج اتحسين فيني.. كيف انساج يالظالمه.. انا من فتحت عيوني على هالدنيا ما شفت غيرج بدنياي..
وداد: والله اني اتعذب سلطان.. انا احبك.. احبك..
سلطان حس انه اشتاق وايد عشان يسمع هالكلمه منها.. وفي نفس الوقت هو حزين.. : انزين والمانع شو؟؟
وداد: ما اقدر اقول لك..
سلطان: كيف يعني ما تقدرين.. لازم اتقولين.. والله مب رادج البيت حلفت غير لما تقولين.. اتهون عليج كل ذكرياتنا..
وداد: دخيلك سلطان بس يكفي..
سلطان نزل على الأرض وحط راسه على ريولها وماسك ايدها ويترجاها: دخيييييلج.. ارحمي حالي.. احبج يا بنت الناس.. العالم كلها تدري اني احبج.. وانتي اول من يدري.. ليش؟؟
..
في بيت بوسلطان..
أحمد: ها غزووول.. شو يبتي لي من هناك؟؟
غزلان: ما عندي سالفه اصرف بيزات واييب لك..
أحمد: لا حوووول.. بدت احين بالكلام الي يعور القلب..
هند: فيدت قلبك انا..
أحمد: عاشت هندووو وبس..
غزلان: اقووول.. سلطان ووداد اتأخروا.. ليكون وداد ذبحت سلطان..
ناصر: أكيد غرقته المجرمه..
أحمد: وا رحمتاه عليك يا أخي..
هند: فال الله ولا فالكم.. شو قالولكم عن وداد.. هاي الي ماشي ارق ولا احن عنها.. شو مجرمه جدامكم..
ناصر: خوفي.. ينط العرج الواصل ما بينها وبين هادف واتسويها..
أحمد تم يخز بنظراته لناصر.. عشان ينتبه للكلام الي يقوله.. وافتشل ناصر وارتبك ما عرف شو يسوي..
هند: شووووو.. بلاه هادف؟
ناصر: ما بلاه شي..
أحمد: ماعليج من نصووور.. ما تدرين به.. لسانه طويل..
ناصر: هي واليوم طال شبر زياده..
غزلان: تعال فديتك خل اقيسه..
ناصر: سخيفه..
غزلان: مب اسخف عنك.. اموووووت امووووووت واعرف شي واحد.. هم احين عن شو يرمسون..؟؟ يا ترى شو الأوضاع بينهم..
أحمد: وانتي اشلج.. ملقوفه..
هند: اقول اتصل فيهم اطمن..
ناصر: انا اتصلت ماشي فايده مغلق تليفون سلطان..
أحمد: واقردي على اخوي ويضرب على صدره.. ما تهنى بشبابه..
غزلان: ههههههههه.. شفيك .. جنك حرمه تضرب على صدرك..
أحمد: شو اسوي.. طاع رمستكم.. مادري على شو زايغين.. هاييل اثنين كبار عقال.. مب شراتج وشرات الخبل ها..
ناصر: احين انا خبل.. مادري منو الخبل فينا... اخبرهم ولا اتم ساكت..
أحمد: شو اتخبرهم.. ؟؟
ناصر: مغامراتك.. وفلسفاتك الي مالها اول ولا تالي..
أحمد: قول اشوف شو بتقول..
ناصر: يقولكم الأخ أحمد في يوم من الأيام قرر يستوي طباخ البيت .. وهو يسوي الغدا ..
أحمد: بس بس لا تكمل..
ناصر: بكمل ليش ما اكمل..
وفجأة الكل صد صوب الباب على صوت ضحكات عاليه.. والكل مبهت ومستغرب.. ويطالع كل واحد فيهم الثاني.. كان سلطان داخل وايده بإيد وداد والضحكات العاليه ماليه البيت كله.. طلعت ام سعيد ويا ام سلطان من الميلس عشان يشوفون شو السالفه.. ومن فرحتهم للمنظر الي جدامهم حضنوا بعض وتموا يصيحون.. وهند من فرحتها نشت وحضنت وداد..
أحمد: كلولولولوووووووش.. عاشووو..
أحمد +ناصر تموا يغنون ويرقصون ويا بعض والكل مستانس: رضا والله وراضيناك.. دلع حتى ودلعناك.. ايوا.. عاشوو.. خمس الحواس سائلني..أحبك لو بعيد الدار عنك.. أيوااااا.. جداك يحن قلبي للرجوعي.. يا لو عني الليالي يبعدني..
ودخل عليهم جاسم ريل فدوى وشاف هاليوله وارتبش وياهم وقطع عليهم الإغنيه بإغنيه ثانيه: البرتقااااله.. ايوا... عذبني حاله..
هند: الله يسامحك جاسم شو ياب البرتقاله للمزروعي..
جاسم: كلهم عيال عم بنت عمي..
فدوى: عيل انا بغني اه ونص..
وداد: لا دخيلج.. كله ولا نانسي مجرم..
أحمد: عاشوو مجرم اونه..
هند: صدقت اختي ما جذبت..
غزلان: احم احم.. وقررت الأنسه غزلان ان تغني.. وعلى الجميع الصمت والإستماع..
سلطان: ياني مشتاااااق لصوتج غزوووول..
غزلان: اشكرك.. احم احم..
ليتك تداريني .. واتحس يا قاسي..
لا تجرح احساسي.. انا انسان حساسي..
ليتك تداريني.. واتحس يا قاسي..
وكانت وهي اتغني الكل يصفق لها.. وهي كل نظراتها كانت موجهة لأحمد وناصر عشان ينشون يرزفون..
اجرح ولا تبالي.. واتصد عن غالي..
يغليك ويداري.. يا اكبر آمالي..
نش أحمد وناصر وتموا يرزفون ويرقصون.. ونش سلطان يكمل وياهم..
الي ملك روحي.. هو سبت جروحي..
ماريد انا غيره.. واهواه وابوحي..
كان الخجل مخيم على ملامح وداد.. والفرحه غامره البيت كله.. إلا بو سلطان.. الي كل تفكيره كيف يواجه بو سعيد عن سالفه هادف.. وهند لاحظت.. وحست ان في شي.. من كلام ناصر.. واحين نظرات عمها
لا لا تعذلوني.. عن ناظر عيوني..
تكفون خلوني.. أهواه وأقاسي
غزلان: شكرا.. شكرا لفرقه الرزيفه الكرام.. وتصفيق حار..
سلطان: انا اليوم ياي لكم بخبر.. والصراحه ماروم اصبر وما اقوله لكم.. انا و وداد تصالحنا لله الحمد.. وقررنا اننا نملج في اقرب فرصه ممكنه..
ام سعيد: كلولولوووووووووووش.. بالمبارك..
ام سلطان: والله صدق.. ربي يفرح قلبك مثل ما فرحت قلبي يا سلطان يا ولد بوسلطان.. يالغالي..
هند: صدق وداد الي اسمعه..
نزلت وداد راسها من المستحى.. والفرحى غامره ملامحها وامبينه عليها.. والكل قام يبارك للثاني.. وهند من شافت عمها صعد فوق.. لحقته.. والباقي كانوا منشغلين بالخبر الحلو.. ومب منتبهين..
هند: عمي..
بوسلطان: هلا والله ببنيتي.. آمري يوبا..
هند: عسى ماشر عمي.. شو فيك؟؟شي مضايق فيك؟
بو سلطان: ماشي بنيتي.. بس تعبان
هند: عمي.. انت من يوم ما وصلنا البلاد وانت مب على عوايدك.. في شي.. عمي لا تخش عن بنتك.. تران ما تروم
بو سلطان: ربي لا يحرمني منج.. ولا من خواتج ..
هند: انا حاسه ان الموضوع يخص هادف اخوي..
بو سلطان سكت وماعرف شو يرد عليها.. وأحمد من لاحظ ان هند وابوه محد صعد وشافهم في الصاله الي فوق واقفين سوى..
هند: عمي؟؟ رد .. هادف بلاه.. اخوي شو فيه؟
أحمد: اخوج ما بلاه شي.. انتي شو فيج؟؟
هند: لا انا حاسه ان في شي انتوا خاشينه.. وانا ابا اعرف هالشي احين..
أحمد: مافي شي يا بنت الناس.. صدقيني..
هند تمت تنتفض .. ونبضات قلبها زادت.. وبدت انفاسها تتسارع.. والعرق يتصبب منها.. والتعب بان على ويها.. ومن شاف أحمد هالحاله خاف عليها وارتبك ما عرف كيف يتصرف.. تم ينادي على وداد.. وداد من سمعت صوت أحمد بسرعه ربعت فوق.. وشافت هند قاعده وعمها حذالها..
هند والدموع في عيونها.. وهي في حضن عمها: قول لي عمي.. طمني؟؟ هادف وينه.
وداد: شوفيج هند.. حبيبتي.. هدي عمرج..
هند: انا حاسه ان هادف بلاه شي.. والكل خاش عنا.. انا ابا اعرف خوي بلاه..
وداد: ما بلاه شي.. تراه عند ربعه.
هند: لا مستحيل.. انا احساسي ما يغلط.. انا حاسه ان في شي خاشينه عني..
وداد: لا خاشينه ولا شي.. انتي بس هدي.. تعالي وياي خل ننزل..
أحمد: وداد.. هند.. صدقوني هادف مافيه شي..
هند زاد انتفاضها.. وتمت تتنفس بشكل سريع.. ومن شافت وداد هالحاله.. ربعت اتييب دواها الي لازم اتحطه تحت اللسان .. ويودونها المستشفى..
وداد: امي .. ابوي.. هند تعبانه.. خل انوديها المستشفى..
سلطان: شووو.. بسرعه.. انا اترياكم في السياره عيل..
غزلان: هندووو.. حبيبتي.. شو فيها..
ناصر: ليش؟شو صاير..
وداد بسرعه شلت هند وعمها وياها يساعدها.. وخذوها للسياره وبسرعه ودوها المستشفى..
غزلان تمت اتصيح.. وأحمد كان يهديها.. : هدي.. مافيها الا كل خير.. تدرين درب السفر طويل كان.. وتعب عليها عشان جيه..
غزلان: ليش ما خليتوني اسير.. ابا اروح وياها.. دخيلكم ودوني..
أحمد: تراني اتصلت على الدريول قال ياي في الدرب.. وموتري ترا ابوي شلاه
ناصر: غزلان.. هدي عمرج.. مافيها الا كل العافيه..
فدوى: لا يكون قالو لها شي؟؟
أحمد: لا محد قال لها..
غزلان: عن شو يقولون لها.. شو السالفه؟؟ انتوا احس بكم في شي خاشينه؟؟
أحمد: لازم حد فيكم يعرف.. وانا بخبرج انتي.. بس انتي لا تنطقين.. لين ما ابوي يتدبر وشوي شوي يخبر عمي ومرت عمي..
غزلان: شو السالفه.. ريحوا بالي..
وتم أحمد يقول السالفه لغزلان.. الي من سمعت السالفه تمت اتصيح..
ناصر: ليش قلت لها.. زين جيه.. بتفضحنا جيه
غزلان: لا ناصر.. ما بخبر حد.. بس انا ما توقعت ان هادف يوصل لهالدرجه.. هذا الي خذ الدلع في البيت كله يطلع جيه .. ليش في شو مقصرين عليه
أحمد: ترا هالمشكله.. الدلع الزايد.. والحريه الزايده..
غزلان: ياما كان سعيد يقول لأبوي .. بس محد كان يسمعه.. اوي.. سعيد.. حبيبي ما دقيت له.. ما تطمنت عليه.. دخليكم دقوا لي على رقمه الي في استراليا ابا اطمن عليه..
ناصر: ان شاء الله انتي بس هدي عمرج..
واتصل أحمد على رقم سعيد وعطى غزلان التليفون: ايه.. مو اتقولين له شي.. تراه برع البلاد ومب ناقص..
غزلان : اوكي.. ألوووو.. فديييييييت اخوي انا.. اشحالك؟؟
سعيد: هلا والله بهالصوت... هلا والله بخنزيرتي.. ااااقصد اختي..
غزلان: خزيرتك ها.. ما عليه.. مصيرك بترد البلاد.. بسجلها لك..
سعيد: لا دخيلج .. خوفتيني.. يالس ارتجف.. الحمد لله على السلامه.. متى وصلتوا..
غزلان: اليوم .. من 3 ساعات تقريبا
سعيد: يالحماره.. مب انا قلت لج اول ما توصلون اتدقون لي.. واحين مروا 3ساعات وتوج اتدقين..
غزلان: شو اسوي.. نسيت..
سعيد: شو الي شاغل بالج يالقمر..
غزلان: اسكت .. عشان كلمه قمر بقولك اخر التطورات..
سعيد: قولي يا ام هلال.. قولي..
غزلان: اسمع.. أخر الأنباء.. ان كل من وداد وسلطان عادت المياه لمجاريها..
سعيد: خوش مجريه اخبار.. العربي منقع..
غزلان: يلا ماعليه المهم تفهم الخبر..
سعيد: قولي جذبه غيرها.. تتمصخرين انتي؟؟
غزلان: طاعوا هذا.. انا من صدق ارمس.. اقولك سلطان ووداد ردوا لبعض.. ولا بعد.. قرروا انهم يملجون في اقرب وقت ممكن..
سعيد: لا لا لا لا.. مااصدق.. قولي والله
غزلان: والله العظيم .. حلفت..
سعيد: كلولولولوووووووووووووووووووووووووووش..
غزلان: فضحتنا.. بيقولون صعيدي في الجامعه الإستراليه..
سعيد: جب انتي.. وكيف ومتى.. واشلون صار ها كله؟؟
غزلان: كيف واشلون بعدني ما دريت.. بس بعد خطه جهنميه قام بتنفيذها كل من العملاء السريين أحمد باشا وناصر بيه..
سعيد: الله الله الله.. فاتي.. عيل المفتش وحيد.. اااقصد سعيد كان ناقصهم..
غزلان: هي والله اتصدق..
سعيد: انزين وين وداد خل ارمسها..
غزلان: وداد.. اااا..
سعيد: شو بلاج..
غزلان: راقده..
سعيد: والباقي.. هند.. امي .. ابوي..
غزلان.. الكل رقود ياخي.. ما تفهم يايين من درب وتعبانين
سعيد: هي.. عيل عطيني شنغل ومنغل..
غزلان: منو شنغل ومنغل.. ؟
سعيد: عيال عمج.. أحمد وناصر..
غزلان: هههههههه.. والله اسم يليق عليهم الصراحه.. هاك.. يلا باااااااااااي..
سعيد: باي...
أحمد: وييييييييييو.. ها يالنصراوي.. فزنا ولا ما فزنا..
سعيد: جب جب .. اصلا انتوا الحكم كان واقف وياكم.. مبينه..
أحمد: شوف.. احين تبا تتحجج عالخساره اتعق اللوم على الأولي والتالي.. ونسيت ان فريقكم فاشل ما يعرف يلعب..
سعيد: لا ترا المدرب مب اوكي.. لو ايبون لنا مدرب مثل الناس نحن بناخذ الدوري..
ناصر: اييييييييه.. اظني انا بعد برمسه.. يلا عاد
غزلان: ههههه.. شكلهم بيحلون عقدة فريق الإمارات..
ناصر: لو يقعدون من اليوم لين باجر العقدة ما بتنفج.. هاي عقدة أزليه.. الخساره مكتوبه على جبينا من يوم ما انولدنا..
أحمد: هاك التليفون.. ويلا عاد.. عن الغلط على المنتخب..
غزلان: أحمد.. اتصل خل نتطمن على هندوو.. ودريولكم ها اخصموا من رابته شو ها اشكثر يتأخر
أحمد: هههه.. بكيفج هو.. اصلا اسماعيل مضبوط في مواعيده بس مادري ليش اليوم اتأخر بالذات.. يمكن اكتأب يوم عرف انج ويانا..
غزلان: سخيف..
أحمد: الو.. سلطان.ز ها شو طمنا؟؟
سلطان: لا الحمد لله استقرت حالتها.. تدري تعب السفر والخوف.. وقلبها ما يتحمل عشان جيه تعبت واحين استقرت حالتها
أحمد: الحمد لله.. الله يبشرك بالخير طمنتنا.. هاي غزلان سندرت راسنا من الصياح جنها ياهل..
غزلان: غصبن عني من خوفي على اختي..
أحمد: انزين وشو بتردونها البيت ولا شقايل؟
سلطان: لا .. كلمنا الدكتور وفهمناه سالفه هادف ان بتزيد حالتها على اثر السالفه فقلنا انخليها لين باجر هني ويوم بيرد هادف بنييبها..
أحمد: لا زين اتسوون.. خلاص عيل.. طمنا أول بأول اذا لا سمح الله صار شي.
سلطان: الكل بيرد احين بس وداد بتم عند هند..
..
في بيت عادل
أميره: اقول عادل.. اوصف لي شكلها..
عادل: اوصف.. اخاف يخوني الوصف..
أميره: الله الله الله.. وينج يا حصووونه تسمعين حبيبج شو يقول؟؟
عادل: وانتي شو عرفج بإسمها؟؟ وبعدين ويييين ياريت لو حبيبها.. جان زين..
أميره:شو شو دراني بإسمها.. انت ترا قلت لي اسمها.. بسم الله عليك اخوي.. شو اشوف الحب خذا عقلك..
عادل: هي والله خذاه وطار بعيد.. انزين أمووور.. اتهقين بيوافقون علي؟
أميره: منو ما بيوافق.. ماشاء الله عليك.. اشوفتمسك ويهه بإيدها.. جمااااال.. ووسامه.. وابتسامه ماشي احلى منها.. ولا بعد دارس.. وماشاء الله عليك شغل ومنصب.. منو يروم يقول لأخوي عدووول لا..
عادل: فديتج والله.. ربي يحبر خاطرج مثل ما جبرتي بخاطري..
أميره: انزين ما وصفت لي شكلها.. فيني فضول ابا اعرف منو هاي الي اسرت اخوي بجمالها
عادل: هي حلوه.. بس مب وايد.. الي محلنها والي جذبني صدق فيها عيونها.. والله يا اميره ماشاء الله عليها يعني.. عيونها.. اتقولين مرسومين رسم.. ماشاء الله عليها عن احسدها
أميره: الله يحفظها.. شو يصبرني لليوم الي بشوفها فيه..
عادل: الله يكتب الي فيه الخير.. ..
الكل رقد في بيت العم ضاعن بوسلطان.. من التعب الي كانوا فيه من درب السفر الطويل.. واما ابو سلطان كان قاعد ويا سلطان ويرمس وياه عن سالفه هادف..
بوسلطان: انزين.. ما قلت لي؟؟ خلاص قدموا تنازلهم اهل محمد..
سلطان: هيه ابوي.. رمست بو محمد .. وقالي انه اليوم سار وتنازل عن القضيه.. يعني نروم انروح باجر وانطلع هادف..
بوسلطان: زين.. الله يبشرك بالخير.. والله هالسالفه كنت وايد متضايق واحاتيها..
سلطان: لا تحاتي ابوي.. بس المهم احين باجر يوم بنييب هادف كيف بنخبر عمي.. لأنه لازم يعرف..
بوسلطان: ولازم انقول له كيف يتعامل ويا هادف من اليوم وساير..
سلطان: هي والله.. خل يخفون الدلع عليه.. يكفي الي صار..
بوسلطان: الا سلطان ما قلت لي.. شو الي خلا وداد تغير رايها..
سلطان: ااااااااه يا ابوي.. والله اني مستانس وفرحااااااان حيل.. ما توقعت ان وداد ترجع لي..
بوسلطان: ممكن اعرف ولا سر؟؟
سلطان: لا شو سر افا .. انا اخش عن أي حد الا انت.. لأني ما تعودت اخش عنك شي.. انت ابوي ورفيجي
بوسلطان: تسلم .. يلا خبرني يا الرفيج..
سلطان: هههههه.. تعرف مريم بنت خالوو..
بوسلطان: هيه شو فيها؟
سلطان: الله يسامحها بس.. هي الي هددت وداد لو انها خذتني بتنتحر.. وبتكون هي السبب في موتها.. واتحيد محاوله مريوم الأولى يوم طاحت في المستشفى.. ترا كان ليش اني كنت بملج على وداد.. فهي من يومها هددت وداد..
بوسلطان: اعوذ بالله من هالبنت.. مادري ليش طالعه جيه؟؟ انا من اشوفها ما احب نظراتها.. امبين عليها خبيثه.. وين طيبه قلب وداد بنيتي.. ووين هاي..
سلطان: هي والله.. نحن شكينا ان مريم ورى السالفه.. بس تأكدت احين يوم مريم رمست.. وخلاص قررنا انرد لبعض.. وانكلم خالوو بالسالفه.. لأن خالو اتعرف انا اشكثر احب وداد
بوسلطان: ربي يهنيك يا ولدي.. ويوفقك...
سلطان: سلمت ابوي..
بوسلطان: بس خل يرد سعيد بالسلامه.. وهادف يعتدل حاله يارب.. والله لسوي لك عرس لا صار ولا استوى.. تراك ولدي العود.. الغالي.. و وداد ولد اخوي الغالي.. وهي بنتي الغاليه .. ما اتمناها غير لك.. ولو ودي ان أحمد ياخذ غزلان..
سلطان: أحمد.. لا ابوي.. أحمد ما يبا غزلان.. يحس بها شرات اخته.. ولا حتى ناصر.. غزلان يباها واحد ولد ناس وعرب.. وكم مره رمسني ورمس اخوها سعيد .. وقايل جريب بيرمس عمي
بوسلطان: منو هذا؟؟
سلطان: مادري جان اتعرفه انت.. إبراهيم ولد مشعل..
بوسلطان: هييييه عرفته.. والله ناس والنعم فيهم.. وإبراهيم دومي اشوفه في المسيد يوم انسير انصلي.. ساكن في فريجنا اعتقد
سلطان: هيه.. بيتهم مجابل بيت عمي.. بس الي عرفته ان غزلان ما تباه..
بوسلطان: ليش ابوي.. والولد ما بلاه شي.. عمرنا ما شفنا عليه شي.. لا يكون ضايق غزلان بشي؟؟
سلطان: لا حشى.. انا كذا مره سائل هند.. قالت لي ان غزلان تمتدحه .. وتمدح احترامه لها.. وعمره ما حط عينه بعينها.. بس هي اتحس به شرات اخوها عشان جيه
بو سلطان: ربي يسهل على قلوبهم.. ما عليك دلع بنات.. حزتها ما ظني بترفض ريال شراته.. غزلان بنت عاقل واتعرف الزين
سلطان: هي والله انا ما اتمنى لها واحد اقل مستوى من إبراهيم..
بوسلطان: ربي يوفقكم يا عيالي.. سير ارقد لأن ورانا نشه من الصبح نظهر قبل لا عمك ينش ويحس بشي..
سلطان: خلاص.. تصبح على خير ابوي وباس راس ابوه وسار غرفته..
..
اليوم الثاني..
الساعه 8.00 الصبح..
بو سلطان: ها سلطان جاهز..
سلطان: هيه جاهز ابوي.. يلا سرينا..
غزلان: وين سايرين..
سلطان: بسم الله .. شو مقعدج من الصبح انتي.. سيري ارقدي يايين من درب طويل..
غزلان: شو اسوي.. متعوده انش من وقت .. وين سايرين؟؟
سلطان: سايرين نستلم اخوج..
غزلان: ههههه.. جيه بضاعه.. دخيلكم يوم تستلمونه.. ضربووووه ضرب..
سلطان: يالجلاده انتي..
غزلان: اقول.. وصلوني المستشفى عند هند..
بوسلطان: يلا ابوي.. عن نتأخر.. وابوج ينشد عن هادف..
غزلان: ثواني.. بلبس عباتي ويايه؟.
سلطان: لا بعد لين 10 جان ما شفتج جدامي ما بوديج..
بو سلطان: لا خذي راحتج.. شو عشر.. تباها تتخرطف واطيح..
سلطان: ههههههههه.. غزاله ما ينخاف عليها..
غزلان: لأني غزاله لازم يخافون علي.. يلا خل انروح..
..
سلطان وبو سلطان نزلوا غزلان المستشفى وساروا المركز..
وغزلان نست تسـألهم عن الغرفه الي مرقدين فيها هند.. فتمت اتدور على غرفتها والقسم الي ممكن اتكون فيه.. وسارت صوب الإستعلامات تسأل..
غزلان: لو سمحت اخوي.. بغيت اعرف وين غرفه هند خليفه ......؟؟
الموظف: الطابق الثاني .. عنبر B غرفه 14
غزلان: مشكور..
راحت غزلان وهي اتدور على رقم الغرفه.. بس من غير لا تنتبه لعمرها سارت بالغلط عنبر A ودخلت غرفه 14.. وهالقسم خاص بالرجال..
غزلان: هنوووده.. وداد.. غزووول يتكم..
دخلت بس ما شافت حد جدامها استغربت.. وشافت باب الحمام مصكوك قالت اكيد هو.. فرت عباتها.. وشيلتها على السرير وتمت اتطبل على باب الحمام..
غزلان: دانا يووو دانه .. يا ويلي من دانا.. إي والله يو عين.. عاشوو.. يلا عاد شو اتسوون داخل..
وفجأة انفتح قفل الباب.. وانفتح الباب..
غزلان: هيييييييييييه.. انت منو؟؟ شو مدخلنك غرفه اختي؟؟ انت منوو؟؟
خالد: انتي الي منووو.. شو مدخلنج غرفتي.. وبعدين ها قسم الحريم..
غزلان من سمعت هالرمسه حست بفشله.. وطلعت من غير لا تنتبه انها مب متغطيه.. ومن انتبهت ردت دخلت وشلت عباتها وربعت برع الغرفه..
خالد: هههههههه.. والله غريبه.. بس والله حلوه.. وصوتها عذاااااب..
دخل ربيعه فهد وشافه خالد سرحان..
فهد: خلوووود.. شوفيك؟؟ بشو بسرحان؟؟
خالد: بالغزال..
فهد: ههههه.. غزال.. أي غزال؟؟ لا يكون ودوك رحله إلى حديقة الحيوان
خالد: هي هي هي.. تتسخف.. غزال ياني لمكاني هني..
فهد: لا انت الظاهر الحادث مب بس أثر على ريولك وراسك.. أثر على مخك بعد..
خالد: فهد لو انت شفت الي انا شفته بتعذرني..
فهد: انزين فهمني شو شفت .. كلامك كله الغاز..
خالد: انا ليش قاعد اعور راسي وياك.. اقول في عنبر الي فيه الحريم شوف غرفه 14 منو الي فيه.. وشو اسمها؟؟
فهد: احين انت نطيت من الغزال لغرفه 14 في عنبر A.. شو فيك؟؟
خالد: ترا الغزال نط هناك..
فهد: ياربي مع هالغزال.. انا بسير اسأل عن الي في غرفه 14 اخاف اتم هني واتخبلني ويا غزلانك..
خالد:زين اتسوي.. يلا عاد..
..
هند: الله ياخذ ابليسج.. ليش ما انتبهتي..
غزلان: شو عرفني من فتح باب الليفت ما لقيت عمري الا لفيت اول ممر جدامي..
وداد: لازم البنت عاشقه ما تنلام..
غزلان: لاحووووول.. ردينا البلاد وردينا على طير يلي..
هند: والله انتي ووداد مادري شو اخرتها وياكم.. وداد زين غيرت رايها .. انتي متى بتغيرين رايج مادري؟؟
غزلان: الا على طاري وداد.. شو السالفه؟؟ شو الوصفه السحريه هذي الي خلتكم اتردون شرات قبل..
وداد: ماشي قلت له عن عقدتي.. وفج لي عقدتي وخلاص..
غزلان: أي عقده بسم الله عليج اختي..
وداد: مريم بنت خالته..
غزلان: هيييييييه .. والله انها حماره ونذله وحقيره وجــ..
هند: بس بس.. عيب عليج.. شوفيج عالبنت.. وبعدين ليش اتسبين من غير لا اتعرفين السالفه؟
غزلان: منو قال اني ما عرف.. عرفت السالفه كلها من سعيد,,,لأنه خبرني وكنت متفقه وياه عساس انا اخبر سلطان وانحل الموضوع..
وداد: انا اراويك يا سعيد تتفق من ورايا..
هند: ودادووو.. ما يخص بتوأمي ما ارضى عليه
وداد: اوه.. اسفين نسيت..
غزلان: اقول.. انتي متى بتردين الدوام.. ؟؟
وداد: بل.. ليش؟؟ تبين الفكه مني..
غزلان: لا اغار انا الإسبوع الياي بداوم وانتي بتمين مأجزه..
وداد: هييييييه قولي جيه من الأول..
الكل فز على دقة الباب..
غزلان: ابيييييييي.. لايكون الريال هاياك.. منووو؟
سلطان: سوولي درب انا سلطان..
غزلان: هند تغطي.. وانتي بعد وداد.. ها سلطان ولد عمي..
وداد: سلطان..
هند: ههههه.. الله على المستحى..
غزلان: هلا والله سلطان حياك دخل سلطان وكان وراه هادف الي من شافته غزلان انصدمت على شكله كيف مستوي ملتحي وحالته لله.. هادف اخوي حبيبي.. اشتقت لك وربعت وحضنته وهو من غير لا يحس بعمره يحضنها زود ويصيح..
هند: هادف.. حبيبي الغالي.. تعال اخوي وحشتني..
هادف: هند.. سلامات.. ما تشوفين شر..
هند: والله طبت بشوفتك يالغالي.. جيه يالظالم ما تتصل في اختك..
هادف: حقج علي وباس راسها احتراما
الكل استغرب .. شو الي غير هادف بهالطريقه.. شو الي غير اسلوبه ويا خواته.. شو الي صاير..
وداد: هادف.. وانا ما بتسلم علي..
هادف: انتي تاج راسي وحضنها وتم يصيح.. والباقي من شافو المنظر ما قدروا يتمالكون نفسهم وتموا يصيحون.. وغزلان سارت صوب سلطان تسأله شو الي صاير..
غزلان: سلطان.. شو الي غير هادف جيه؟
سلطان: علمي علمج غزلان.. مادريبه.. من وقت ما يبناه وهو كل شوي يبوس راس ابوي.. وكل شوي يستسمح منه.. يعني حالي من حالج مب عارف شو السالفه..
غزلان: الله لا يغير هالحال على خوي.. فديته والله..
وهذا الجزء وخلصته..
ياترى شو سر تغيير هادف؟؟ وشو الي بيعقب هالتغيير؟؟
وخالد.. شو قصته.. شو دوره؟؟
وعادل.. راح يوافقون عليه ولا؟؟
اسمحوا لي لو كان قصير بس تدرون الظروف..
ان شاء الله نلتقي في الجزء الخامس على الإسبوع الياي..
العرض العادي
